HOŞ GELDIŇIZ!

   Her ýylyň 23-nji iýuny – Halkara Olimpiýa güni dünýä jemgyýetçiliginde sportuň adamzady birleşdirýän, ynsanperwer gymmatlyklary wagyz edýän, parahatçylyga we ynanyşmaga daýanç bolup çykyş edýän güýç hökmünde bellemek däbi dowam etdirilýär. Bu sene 1894-nji ýylda Parižde Halkara Olimpiýa komitetiniň esaslandyrylmagynyň hormatyna döredilip, häzirki döwürde diňe bir sport çäreleri bilen däl, eýsem, bedenterbiýe, bilim we jemgyýetçilik işjeňligi arkaly dünýäde dostlugy, agzybirligi we ösüşi ösdürmek maksady bilen giňden bellenilýär.

   Şu halkara sene mynasybetli Türkmen döwlet bedenterbiýe we sport institutynda geçirilen «Sport – dünýäniň parahatçylygy!» atly ylmy-amaly maslahat hem diňe bir sport ulgamynyň ösüşini görkezmek bilen çäklenmän, eýsem, ýurdumyzyň dünýä jemgyýetçiligindäki ynsanperwerlik syýasatynyň aýdyň beýany boldy.

   Maslahata gatnaşan ylym-bilim ulgamynyň wekilleri, professor-mugallymlar, talyp ýaşlar çykyşlarynda ýurdumyzyň Olimpiýa hereketiniň belent ýörelgelerine ygrarlydygyny, sport ulgamynda halkara hyzmatdaşlygyny ösdürmekde uly tagallalaryň edilýändigini nygtadylar. Çykyşlarda aýratyn bellenilişi ýaly, sport diňe fiziki taýdan sagdynlygy üpjün edýän serişde däl-de, eýsem halklaryň arasynda dostluk, düşünişmek we birek-birege hormat goýmak medeniýetini hem ösdürýän güýçli ähmiýete eýedir. Şeýle hem dabaranyň dowamynda Türkmen döwlet bedenterbiýe we sport institutynyň «Sagdyn nesiller» çeper höwesjeňler toparynyň ýerine ýetiren aýdym-sazly hem-de edebi çykyşlarynda ýurdumyzyň sport ulgamynda gazanýan üstünlikleri, ýaş nesliň beden we ruhy taýdan kämillige ýetmegi baradaky beýik maksatlar joşgunly wasp edildi.

   Maslahatyň çäklerinde sportuň dürli görnüşleri boýunça geçirilen ýaryşlar ýaşlaryň sporta bolan höwesini artdyrmak bilen birlikde, türgenleriň ruhubelentligini ýokarlandyrdy.

   Halkara parahatçylyk we ynanyşmak ýylynda Türkmenistanyň Bedenterbiýe we sport baradaky döwlet komitetiniň hem-de Türkmen döwlet bedenterbiýe we sport institutynyň bilelikde guramagynda paýtagtymyz Aşgabat şäherinde sportuň küşt görnüşi boýunça 8, 10 we 12 ýaşly türgenleriň arasynda halkara ýaryşynyň üstünlikli geçirilmegi mynasybetli hoşallyk maslahaty ähmiýetli waka öwrüldi.

   Maslahata ylym-bilim ulgamynyň wekilleri, sport tälimçileri, talyp ýaşlar hem-de jemgyýetçilik guramalarynyň agzalary gatnaşdylar. Çykyş edenler sportuň bu görnüşiniň ýurdumyzda ösdürilmeginiň ýaş nesliň aň-paýhas mümkinçilikleriniň kämilleşmegine, halkara dostluk gatnaşyklarynyň pugtalandyrylmagyna goşant goşýandygyny nygtadylar.

   Maslahatda çykyş edenler ýaş küştçileriň halkara ýaryşynda üstünlikli çykyş edip, umumy toparlaýyn hasapda 1-nji orna mynasyp bolmaklaryny buýsanç bilen bellediler. Şeýle-de, halkara ýaryşa gatnaşyjy türgenlere Türkmen halkynyň Milli Lideri, Gahryman Arkadagymyzyň adyndan Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň hasabyna gymmatly sowgatlaryň gowşurylmagynyň aýratyn ähmiýete eýedigi nygtaldy.

   Maslahatyň dowamynda Türkmen döwlet bedenterbiýe we sport institutynyň «Sagdyn nesiller» çeper höwesjeňler toparynyň ýerine ýetirmeginde aýdym-sazly edebi çykyşlar ýaýbaňlandyryldy. Bu çykyşlarda döwrümiziň belent ruhy wasp edildi.

   Hoşallyk maslahatyna gatnaşyjylar Gahryman Arkadagymyza we Arkadagly Gahryman Serdarymyza ýurdumyzda ýaş nesliň beden we ruhy taýdan kämil ösmegi ugrunda döredilýän mümkinçilikler üçin çäksiz hoşallyk sözlerini beýan etdiler. Dabaranyň ahyrynda Hormatly Prezidentimiziň adyna Ýüzlenmäniň kabul edilmegi hoşallyk maslahatynyň ähmiýetini has-da ýokarlandyrdy.

   Halkara parahatçylyk we ynanyşmak ýylynda Türkmen döwlet bedenterbiýe we sport institutynda medeniýet we sungat işgärleriniň hem-de Magtymguly Pyragynyň şygryýet güni mynasybetli «Berkarar döwletimizde Magtymguly Pyragynyň döredijiligi umumadamzat ylmynyň we medeniýetiniň hazynasydyr» atly ylmy-amaly maslahat geçirildi.

   Bu çärä gatnaşan ylym-bilim ulgamynyň wekilleri, mugallymlar, talyp ýaşlar öz çykyşlarynda Gündogaryň beýik söz ussady, türkmen halkynyň ruhy genji-hazynasynyň döredijilik çeşmesi Magtymguly Pyragynyň pähim-parasatly setirleriniň häzirki döwrüň ruhy binýadyna öwrülendigini aýratyn nygtadylar. Akyldaryň her bir setiri diňe bir şygryýet öwüşgininden däl, eýsem, ahlak we watansöýüjilik mekdebinden nyşandyr.

   Maslahatyň dowamynda çykyş edenler Magtymguly Pyragynyň adamzat ynsanperwerligine, halklaryň agzybirligine, parahatçylyga bolan çagyryşlarynyň häzirki zaman türkmen jemgyýetiniň ösüş ýörelgeleri bilen sazlaşýandygyny belläp geçdiler. Gahryman Arkadagymyzyň hem-de Arkadagly Gahryman Serdarymyzyň baştutanlygynda häzirki döwürde ýurdumyzda medeniýetimize, edebiýatymyza, ýaş nesliň ruhy taýdan kämilleşdirilmegine aýratyn ähmiýet berilýär. Şol möhüm taglymatlar ylmy-amaly maslahatda çykyş edenleriň pikirlerinde hem giňden beýan edildi.

   Çäräniň dowamyndaky «Sagdyn nesiller» çeper höwesjeňler toparynyň ýerine ýetiren aýdym-sazly, edebi kompozisiýalary bolsa, Magtymguly Pyragynyň dünýäsi bilen halkymyzyň bagtyýar ýaşaýşynyň, gözel zamanamyzyň sazlaşygyny belent buýsanç bilen wasp etdi. Ylmy-amaly maslahatyň jemlerinde çykyş edenler ýurdumyzy ösüşiň belentliklerine alyp barýan Gahryman Arkadagymyza hem-de Arkadagly Gahryman Serdarymyza çuňňur hoşallyk duýgularyny beýan etdiler.

   Dünýä döwletleriniň ençemesinden çagalaryň köp sanlysy tomusky dynç alşynda gözel Aşgabatda myhman bolmak bagtyna eýe bolýar. Olar sportuň, ruhubelentligiň, ýeňişleriň şäherine öwrülen merjen paýtagtymyzda badalga berlen sportuň küşt görnüşi boýunça halkara ýaryşyna gatnaşýarlar.

   Halkara ýaryşa gatnaşyjy döwletleriň sany, ýurdumyz bilen bilelikde, 11-e ýetip, olaryň wekilleri bolsa 200-e golaýlaýar. Biziň wekillerimizden başga, Aşgabatdaky halkara ýaryşyň medallaryna eýe bolmak üçin Eýran,    

   Gazagystan, Gyrgyzystan, Özbegistan, Täjigistan, Hindistan, Russiýa, Tailand, Wýetnam, Malaýziýa ýaly ýurtlardan küştçüler paýtagtymyza geldiler. Daşary ýurtlaryň wekilçilikli toparlarynyň arasynda ata-eneler, tälimçiler, topar ýolbaşçylary, resmi wekiller hem bar. Ýaryşa Türkmenistandan 80-den gowrak ýaş küştçiniň gatnaşmagyna garaşylýar.

   Türkmen, iňlis we rus dillerinde taýýarlanan gollanmalar esasynda halkara ýaryş barada giňişleýin maglumatlar, täzelikler we oýunlaryň netijeleri bilen onlaýn usulynda tanyş bolmak, Halkara küşt federasiýasynyň (FIDE) küştüň taryhyna bagyşlanan ilkinji sanly muzeýine syýahat etmek mümkinçilikleri döredildi. Onlaýn-arhiw muzeýi küşt oýnunyň taryhy ösüşi baradaky gyzykly materiallary hödürläp, gadymy döwürlerden häzirkizaman ýaryşlaryna çenli döwri öz içine alýar. Halkara küşt federasiýasynyň maglumatlaryna görä, muzeý küşt artefaktlarynyň dünýäde iň uly ammarydyr. Ol kitaplary, resminamalary we beýleki gymmatly materiallary birleşdirýär.

   Türkmen döwlet bedenterbiýe we sport instituty tarapyndan taýýarlanan halkara ýaryşyň maglumatlar gollanmasyny şu ýerden ýükläp alyp bilersiňiz.

   Türkmenistanyň ýokary okuw mekdeplerinde sport infrastrukturasyny çuňňur öwrenmek maksady bilen taýýarlanan “Sport desgalary” atly okuw kitaby ýurdumyzyň sport ulgamy üçin ähmiýetli neşirleriň biri bolup çykyş edýär. Jennet Hydyrowa, Alty Garýagdyýew, Serdar Baýsähetow we Gülnabat Garýagdyýewa ýaly tejribeli pedagoglar tarapyndan taýýarlanan bu kitap “Ylym” neşirýaty tarapyndan neşir edilip, Türkmen döwlet bedenterbiýe we sport institutynyň okuw maksatnamasyna laýyklykda düzülendir.

   Okuw kitabynda sport desgalarynyň taryhy ösüş ýoly bilen birlikde, olaryň häzirki zaman görnüşleri, gurluşyk aýratynlyklary, tehniki häsiýetnamalary we howpsuzlyk kadalary giňişleýin beýan edilýär. Esasan hem köpugurly sport toplumlary, olaryň maksatly ulanylyşy, toplumlaryň taslama işi hem-de gurluşygy bilen bagly meseleler ylmy-usuly taýdan düşündirilýär.

   Kitabyň aýratyn ähmiýetli taraplarynyň biri hem onuň paýtagtymyz Aşgabatda ýerleşýän Olimpiýa şäherjigindäki iri sport desgalaryna aýratyn orun bermegidir. Talyp ýaşlar bu neşiriň üsti bilen dünýä ölçeglerine laýyklykda gurlan stadionlar, sport toplumlary hem-de türgenleşik merkezleri bilen tanşyp bilerler. Şonuň ýaly-da, sport desgalaryna gözegçilik etmek, olaryň tehniki hyzmatlary we dolandyrylyş ulgamyny öwrenmek ýaly meseleler hem kitabyň esasy bölümleriniň biridir.

   “Sport desgalary” okuw kitaby diňe bir talyplar üçin däl, eýsem, sport gurluşygy bilen meşgullanýan inženerler, tälimçiler, sport dolandyryş işgärleri hem-de bedenterbiýe we sporta gyzyklanma bildirýän ähli okyjylar üçin hem ähmiýetli çeşmedir. Okuw kitaby sport infrastrukturasynyň gurluşy bilen tanşyp, bu ulgamy ösdürmek isleýän ýaşlar üçin ygtybarly ýol görkeziji bolup hyzmat edýär.

   Türkmenistanyň sport ulgamynyň döwrebaplaşdyrylmagyna, sagdyn durmuş ýörelgesiniň ýaýbaňlandyrylmagyna we halkara ölçeglere laýyk sport giňişliginiň döredilmegine bu okuw kitaby örän möhüm goşant goşýar.