HOŞ GELDIŇIZ!

Gahryman Arkadagymyzyň başlangyçlary, Arkadagly Gahryman Serdarymyzyň taýsyz tagallalary bilen, milli bilim we sport ulgamlaryny ösdürmekde, ösüp gelýän ýaşlaryň zamanabap bilimli, giň dünýägaraýyşly, döwrüň ösen tehnologiýalaryndan baş çykarýan zehinli hünärmenler, döwletimiziň sport abraýyny täze belentliklere göterjek türgenler bolup ýetişmekleri ugrunda giň gerimli işler durmuşa geçirilýär. Türkmen döwlet bedenterbiýe we sport institutynda öňde duran täze okuw ýylyna ähli taraplaýyn taýýarlyk görüldi.

2026 — 2027-nji okuw ýylynda ýokary okuw mekdebimize ýaşlaryň 700-si okuwa kabul edildi. Şunuň bilen birlikde aprel-maý aýlarynda ýurdumyzyň umumybilim berýän orta mekdepleriniň we sport mekdepleriniň gutardyş synp okuwçylarynyň, şeýle hem sporta höwesli ýaşlaryň gatnaşmagynda, sportuň dürli görnüşleri boýunça açyk çempionatlaryň geçirilendigini aýratyn bellemek bolar. «Zehinli ýaşlar — türgenleriň täze nesli» diýen at bilen geçirilen ýaryşlar aýratyn ähmiýete eýe boldy. Ýaryşlarda görkezen netijelerine seredilip, ýaşlaryň 50-den gowragy okuwa kabul edildi.

Giriş synaglarynda talyplyga dalaşgärleriň öň gazanan sport üstünlikleri aýratyn nazara alyndy. Halkara derejeli ýaryşlarda, döwlet, welaýat, şäher we etrap derejelerinde geçirilen çempionatlarda, birinjiliklerde we kubok ýaryşlarynda baýrakly orunlary eýelän türgenleriň görkezijileri ýokary hasaplanylýar. Türkmenistanyň milli ýygyndy toparlarynyň agzalarynyň netijeleri hem degişli tertipde hasaba alynýar. Bu gezekki giriş synaglarynda Türkmenistanyň Bedenterbiýe we sport baradaky döwlet komitetiniň hödürnamasy boýunça sportda tapawutlanan, şol sanda ýurdumyzyň milli ýygyndy toparlarynyň agzalary bolup durýan türgenleriň 103-si instituta okuwa kabul edildi.

Okuwa kabul edilen talyplaryň 8-si sport ussady, 27-si sport ussatlygyna dalaşgär, 49-sy halkara sport ýaryşlarynyň, 162-si bolsa döwlet derejeli ýaryşlaryň ýeňijileridir. Şeýle hem okuwa kabul edilen ýaşlaryň 117-si sportuň dürli görnüşleri boýunça Türkmenistanyň milli ýygyndy toparlarynyň agzalarydyr.

Ajaýyp zamanamyzda ýurdumyzda ylym-bilim bilen sportuň özara sazlaşyga eýe bolýandygyny nygtamak ýakymlydyr. Häzirki döwürde sportuň ösüşini ylmy çemeleşmelerden üzňe göz öňüne getirmek mümkin däldir. Şonuň üçin ýokary okuw mekdebine kabul edilen her bir ýaş zehiniň ylmy gözleglere bolan gyzyklanmasyny ösdürmek, sportda gazanylýan netijeleriň ylmy esaslaryny öwrenmegini, öňdebaryjy tehnologiýalary özleşdirmegini gazanmak möhüm wezipeler bolup durýar. Ýokary okuw mekdebimizde bu ugurda alnyp barylýan işler giň gerime eýedir. Her ýylda geçirilýän ýaş alymlaryň ylmy bäsleşigine institutyň ýaş alymlarynyň, mugallymlarynyň, talyp ýaşlaryň işjeň gatnaşyp, baýrakly orunlara mynasyp bolýandygy biz üçin guwandyryjydyr.

Sentýabr aýynda mukaddes Garaşsyzlygymyzyň şanly 35 ýyllygy uly toý dabaralary bilen bellenilip geçiler. Täze okuw ýylyna taýýarlyk görmek bilen bir wagtda institutyň professor-mugallymlary, talyp türgenleri bu şanly senäni mynasyp sowgatly garşylamak üçin yhlasly zähmet çekerler. Baş baýramymyza halkara ýaryşlarda altyn, kümüş, bürünç medallary gazanyp, mukaddes ýaşyl tugumyzy belentde parladyp barmak her bir türkmen türgenimiziň beýik isleg-arzuwydyr.

Täze okuw ýyly — täze maksatlaryň, üstünlikleriň we ýeňişleriň başlangyjy bolar. Biz — ýurdumyzyň bilim hem-de sport ulgamynyň hünärmenleri, özümiz üçin döredilen şertlerden peýdalanyp, milli bilimiň hem-de sportuň mundan beýläk-de belent sepgitlere ýetmegi, türkmen sportunyň abraýyny täze belentliklere göterjek türgenleriň kemala gelmegi ugrunda yhlasly zähmet çekeris. Ýaşlarymyza döwrebap bilim bermekde, milli sportumyzyň ösmegi ugrunda giň mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag, il-ýurt bähbitli beýik işleri hemişe rowaç bolsun!

Bedenterbiýe we sport (hünär: sport).

1. Bedenterbiýe we sport (hünärler: sport; bedenterbiýe; sport žurnalistikasy; sagaldyş işi; sport tehnologiýalarynyň tehniki üpjünçiligi).

2. Ykdysadyýet we dolandyryş (hünär: sport desgalaryny dolandyrmak).

3. Psihologiýa ylymlary (hünär: sport psihologiýasy).

Instituta umumy orta bilimden pes bolmadyk binýatda bilimi bolan, ýaşy 35-den geçmedik Türkmenistanyň raýatlary giriş synaglarynyň netijeleri boýunça bäsleşik esasynda kabul edilýär.

Resmi iş kagyzlary welaýat merkezlerinde we Aşgabat şäherinde (Aşgabat we Arkadag şäherleri boýunça) 2026-njy ýylyň 13 — 26-njy iýuly aralygynda kabul edilýär.

— bellenilen nusgada rektoryň adyna ýazylan arza;

— bellenilen nusgadaky sowalnama (anketa);

— bilimi baradaky resminama (asyl nusgasy);

— Türkmenistanyň Saglygy goraýyş we derman senagaty ministrligi tarapyndan bellenilen nusgadaky saglyk kepilnamasy;

— soňky okan ýerinden (işlän ýerinden, harby bölümden) häsiýetnama;

— 3x4 sm ölçegdäki sekiz sany fotosurat;

— işleýänler üçin zähmet depderçesiniň tassyklanan göçürmesi;

— I sport derejesinden pes bolmadyk türgeniň hünär dereje kitapçasy, sport mekdebinden hödürnama we häsiýetnama («Sport» hünäri boýunça resminama tabşyrýan dalaşgärler üçin);

— okuw dersleri boýunça mekdep okuwçylarynyň döwlet bäsleşiginiň ýeňijileri, halkara bäsleşiklere gatnaşan Türkmenistanyň ýygyndy toparynyň agzalary, Türkmenistanyň çempionlary we halkara sport ýaryşlarynyň ýeňijileri şol ýagdaýlary tassyklaýan degişli resminamanyň asyl nusgasyny tabşyrýarlar.

Bulardan başga-da, okuwa girmäge isleg bildirýänler ýokarda görkezilen resminamalar bilen birlikde, resminamalary kabul edýän iş toparyna aşakdakylary görkezýärler we nusgalaryny tabşyrýarlar:

— pasportyny;

— harby şahadatnamasyny ýa-da harby hasaba goýlandygy hakynda şahadatnamasyny.

Dalaşgär bäsleşiksiz we (ýa-da) okuwa kabul edilmek üçin artykmaç hukukdan peýdalanýandygyny tassyklaýan beýleki resminamalary görkezip biler.

Nädogry berlen maglumatlar we galp resmi iş kagyzlary üçin dalaşgär şahsy jogapkärçilik çekýär.

Giriş synaglary we okuwa kabul edilmek institutda (Aşgabat ş.) aşakdaky möhletlerde geçirilýär:

Aşgabat we Arkadag şäherleri — iýul aýynyň 29-30-y, 31-i we awgust aýynyň 2-si günleri;

Ahal welaýaty — iýul aýynyň 30-y, awgust aýynyň 1-i we 3-i günleri;

Balkan welaýaty — awgust aýynyň 4-i, 6-sy we 8-i günleri;

Daşoguz welaýaty — awgust aýynyň 5-i, 7-si we 8-i günleri;

Lebap welaýaty — awgust aýynyň 9-y, 11-i we 13-i günleri;

Mary welaýaty — awgust aýynyň 10-y, 12-si we 13-i günleri.

Giriş synaglary aşakdaky okuw dersleri boýunça geçirilýär:

hünär: sport — sportuň saýlanan görnüşi (okuwa girýänler saýlap alan sportuň görnüşinden tassyklanylan möçbernamany ýerine ýetirmeli), biologiýa, Türkmenistanyň taryhy;

hünärler: bedenterbiýe; sagaldyş işi — beden taýýarlygy boýunça tassyklanylan möçbernamany ýerine ýetirmeli, biologiýa, Türkmenistanyň taryhy;

hünär: sport psihologiýasy — türkmen dili we edebiýaty, biologiýa, Türkmenistanyň taryhy;

hünär: sport žurnalistikasy — türkmen dili we edebiýaty, Türkmenistanyň taryhy, jemgyýeti öwreniş;

hünärler: sport desgalaryny dolandyrmak; sport tehnologiýalarynyň tehniki üpjünçiligi — matematika, Türkmenistanyň taryhy, jemgyýeti öwreniş.

Okuw dersleri boýunça giriş synaglary Türkmenistanyň orta mekdepleriniň okuw maksatnamalarynyň esasynda, döwlet dilinde dilden geçirilýär.

Giriş synaglarynyň tertibinde bellenilen wagtda synaglara esassyz sebäplere görä gelip bilmedikler ýa-da okuw dersleriniň biri boýunça synagdan geçip bilmedikler soňky synaglara goýberilmeýär.

Giriş synaglaryndan üstünlikli geçen ýagdaýynda, bäsleşiksiz we talyplyga kabul edilmek üçin artykmaç hukukdan:

— orta sport mekdeplerini tamamlan ýokary derejeli türgenler;

— 2022 — 2026-njy ýyllarda geçirilen halkara ýaryşlaryň ýeňijileri;

— 2022 — 2026-njy ýyllarda sportuň görnüşleri boýunça Türkmenistanyň milli ýygyndy toparlarynyň agzalary;

— «Bilim hakynda» Türkmenistanyň Kanunynyň rejelenen görnüşinde kesgitlenen düzgünlere laýyk gelýänler peýdalanýarlar.

Türkmen dzýudoçysy Maýsa Pardaýewa Hytaý Halk Respublikasynyň Sindao şäherinde geçirilen dzýudo boýunça Gran-pri ýaryşynyň ýeňijisi boldy.

57 kilograma çenli agram derejesinde geçirilen final duşuşygynda Pardaýewa Fransiýanyň wekili Marta Fawazy ýeňip, altyn medala mynasyp boldy.

Sindaoda geçirilýän ýaryş 28-nji iýunda tamamlanýar. Bu ýaryş 2028-nji ýylda ABŞ-nyň Los-Anjeles şäherinde geçiriljek Olimpiýa oýunlaryna saýlama tapgyrynyň ikinji ýaryşydyr.

21 ýaşly Maýsa Pardaýewa mundan ozal Mongoliýanyň Ulan-Bator şäherinde geçirilen «Uly tuwulga» tapgyrynda bürünç medal gazanypdy. Ol 2024-nji ýylda Parižde geçirilen Olimpiýa oýunlarynda Türkmenistanyň milli ýygyndysynyň düzüminde çykyş edipdi.

Bäsleşigiň jemleýji tapgyryna deslapky tapgyrlarda öňe saýlanyp, özleriniň zehini we ukyby bilen tapawutlanan talyplaryň 27-si gatnaşdy.

Iki günläp dowam eden çäräniň barşynda eminler bäsleşige gatnaşyjylaryň okan döwründe alan ortaça bahalaryny, dürli derejelerdäki bäsleşiklere gatnaşyklaryny, ýerine ýetirýän ylmy-barlag işleriniň hilini, şeýle hem intellektual eýeçilik boýunça alan awtorlyk şahadatnamalaryny we wagyz-nesihat işlerine işjeň gatnaşyklaryny hemmetaraplaýyn bahalandyrdylar.

Gyzgalaňly geçen çäräniň jemleýji gününde oňa gatnaşyjylaryň häzirki zaman türkmen jemgyýeti we kompýuter tehnologiýalary dersleri boýunça tabşyran test barlaglarynyň netijeleri yglan edildi. Synaglaryň iň soňky tapgyrynda alnan bu täze ballar talyplaryň öňki günlerde gazanan görkezijileriniň üstüne goşulyp, bäsleşigiň gutarnykly ýeňijileri mälim edildi. Netijede, bäsleşigiň ähli şertlerini berjaý edip, iň ýokary görkezijini gazanmagy başaran Halkara ynsanperwer ylymlary we ösüş uniwersitetiniň 4-nji ýyl talyby Daniýar Emirkulyýew öz bäsdeşlerinden saýlanyp, 67,55 bal bilen «Ýylyň talyby» diýen abraýly adyň eýesi boldy. Bäsleşikde birinji orny Türkmenistanyň Telekommunikasiýalar we informatika institutynyň 4-nji ýyl talyby Baýnazar Muhammedow eýeledi.

Ikinji orna Seýitnazar Seýdi adyndaky Türkmen döwlet mugallymçylyk institutynyň 4-nji ýyl talyby Gurtgeldi Hanow bilen Türkmenistanyň Serhet institutynyň 4-nji ýyl harby talyby Gündogdy Aýmämmedow mynasyp boldular. Üçünji orny bolsa Türkmenistanyň Milli howpsuzlyk institutynyň 4-nji ýyl harby talyby Rahat Ataýew, Myrat Garryýew adyndaky Türkmenistanyň Döwlet lukmançylyk uniwersitetiniň 6-njy ýyl talyby Muhammedaly Atabaýew, Türkmen döwlet binagärlik-gurluşyk institutynyň 3-nji ýyl talyby Batyr Öwezmyradow, Türkmen döwlet bedenterbiýe we sport institutynyň 3-nji ýyl talyby Hajymyrat Ilimow hem-de Aba Annaýew adyndaky Halkara atçylyk akademiýasynyň 3-nji ýyl talyby Guwanç Ýoldaşow dagy paýlaşdylar.

Ýeňijilere we bäsleşige işjeň gatnaşanlara guraýjylar tarapyndan Hormat haty hem-de ýadygärlik sowgatlar dabaraly ýagdaýda gowşuryldy.

Ylymlar güni mynasybetli Türkmenistanyň Oguz han adyndaky Inžener-tehnologiýalar uniwersitetinde ýaş alymlaryň we talyplaryň arasynda ylmy işler boýunça geçirilen bäsleşigiň ýeňijilerini sylaglamak dabarasy geçirildi. Türkmenistanyň Ylymlar akademiýasy we Magtymguly adyndaky Ýaşlar guramasynyň Merkezi Geňeşi tarapyndan bilelikde guralan bu abraýly çärä ýurdumyz boýunça 1500-den gowrak ýaş alymlar hem-de talyplar gatnaşyp, olar alty sany möhüm ylmy ugur (nanotehnologiýalar, biotehnologiýa, maglumat ulgamlary, lukmançylyk, innowasion ykdysadyýet we ynsanperwer ylymlary) boýunça öz taslamalaryny hödürlediler. Bäsleşigiň netijelerine görä, iň oňat diýlip saýlanan 170 sany zehinli ýaşlar ýeňiji diýlip yglan edildi we olara döwlet Baştutanymyzyň adyndan şahadatnamalar hem-de gymmat bahaly sowgatlar gowşuryldy. Bu bäsleşikde Türkmen döwlet bedenterbiýe we sport institutynyň sportuň mediki-biologik üpjünçiligi kafedrasynyň mugallym-öwrenijisi Aýmaral Azatgeldiýewa «Türgenlerde madda çalşygynyň derejesini metabolograf enjamy arkaly seljermek» atly ylmy işi bilen üstünlikli çykyş edip, 2-nji orna mynasyp boldy. Dabaranyň dowamynda döwletimiziň gazanýan üstünliklerinde ylymly-bilimli ýaşlaryň edýän goşandy aýratyn nygtalyp, çäre ýeňijileriň Ýüzlenmesi we sungat ussatlarynyň baýramçylyk çykyşlary bilen jemlenildi.