Lýuksemburgda hokkeý boýunça dünýä çempionatynyň üçünji dwizionynyň «A» toparçasyndaky duşuşyklar tamamlandy. Bu ýaryşda Türkmenistanyň hokkeý boýunça milli ýygyndysy bürünç medala mynasyp boldy. Milli ýygyndymyz dört duşuşykda 4 utuk topladylar.
Taýwan bilen Lýuksemburgyň arasynda geçirilen duşuşykdan soňra Şaýbaly hokkeý boýunça halkara federasiýanyň (IIHF) wise-prezidenti Aýwaz Omorkanow Türkmenistanyň ýygyndysyna bürünç medallary we ýadygärlik nyşany gowşurdy.
Duşuşyklaryň 3-8-nji aprel aralygynda Lýuksemburgyň Kokelşoýer şäherinde geçirilendigini ýatladýarys. Ýaryşda BAE-niň ýygyndysy birinji orny eýeläp, 2023-nji ýylda ikinji dwizionyň «B» toparçasynda ýaryşmaga hukuk gazandy.
Türkmenistanyň hokkeý boýunça milli ýygyndysynyň düzüminde ýokary okuw mekdebimiziň sport fakultetiniň talyby Rahman Myradowyň, sportuň olimpiýa görnüşleri fakultetiniň talyplary Arslan Geldimyradowyň, Begenç Döwletmyradowyň, Öwezguly Esenowyň, Musa Annasaparowyň çykyş edýändikleri buýsandyryjy ýagdaýdyr.