Adamyň saglygyny berkitmekde, fiziki ösüşinde we keselleriň öňüni almakda bedenterbiýäniň we sportuň ähmiýeti uludyr. Hereket işjeňliginiň orta we gartaşan ýaşly adamlarda peselmegi aterosklerozyň emele gelmegini tizleşdirýär, gan damarlaryň tonusynyň sazlanyşyny erbetleşdirip, beýni we ýürek gan aýlanyşynyň bozulmagyna getirýär. Hereket ýetmezçiligi sebäpli myşsalaryň gowşaklygy, salparmagy bolýar, küýkülik döreýär, garrama hadysalary tizleşýär, köplenç hem arterial gan basyşyň artmagyna getirýär. Keseller ýiti, ýitileşen we dowamly görnüşde geçýär. Adam bedeni bir bütewidir, şonuň üçin bir ulgam ejir çekende beýleki agzalaryň we ulgamlaryň zeperlenmegine getirýär, şol sebäpli hassa köp taraplaýyn täsir etmek zerurdyr. “Fizioterapiýa” dersinde keselleri fizioterapiýa usullary bilen bejermeklik barada maglumat we ulanylýan fiziobejerilişiň görnüşleri öwredilýär.